Uniform Civil Code hi hman a ni ngei dawn : Assam CM

Assam chief minister Himanta Biswa Sarma chuan India ramah Uniform Civil Code (UCC) chu hman a ni ngei dawn a, a ruala nupui/pasal pakhat ai tam nei awm ṭhin chu tihtawp a ni dawn, a ti.

Pathiannia Telangana BJP president leh Lok Sabha MP Bandi Sanjay Kumar-a'n Karimnagar-a 'Hindu Ektra Yatra' a buatsaih a hmanpuinaah CM Sarma hian a sawi a ni. Sarma chuan, " India ramah mi ṭhenkhat, nupui pali pawh a ruala nei theia inngai an awm a ni. Mahse hei chu an rindan mai a ni. A rualin nupui pali hi an nei thei dawn lo a, an nei thei nia an inngaihna chu a tawp thuai tawh dawn. Uniform Civil Code chu India ramah hman a ni ngei dawn," tiin a sawi. An state-ah pawh nupui/pasal pakhat aia tam neih phalna, polygamy tihtawpna tur dan siam turin member pali awmna expert committee din a nih tawh tih a sawi bawk.