Manipur-ah dik taka rorel zel a ni ang : HM Amit Shah

Union home minister Amit Shah chuan Manipur tualchhung buaina thleng chungchangah dik taka rorel a ni dawn tih sawiin, buaina chawk chhuaktute chungah na taka hremna lekkawh a nih tur thu a sawi. Hemi rual hian state sorkarin boruak ṭha a awm theihna atan a hmalaknaah sorkar laipui chuan a thlawp zel tur thu a sawi bawk.

Manipur-a Meitei leh tribal, a bikin Kuki-te inkara buaina nasa tak a chhuah hnuah, Amit Shah hian Manipur chief minister N Biren Singh bakah, Meitei leh Kuki pawl aiawhte leh stakeholder hrang hrangte chu meeting a lo neihpui tawh a, state chhung dinhmunte an sawiho a ni.

Shah chuan Manipur-a pawl hrang hrangte chu boruak ṭha a awm theihna atana hma la zel tura ngenin, buaina chawk chhuak zawnga chete chungah rorelna dik taka lekkawh zel a ni ang, a ti. State sorkar chuan state chhunga hnam hrang hrangte venhimna turin hma a la zel dawn a ni, tiin Shah chuan a sawi bawk. Tualchhung buaina chhuak tuartute chhawmdawlna leh enkawl hna pawh chak taka kalpui zel turin a chah.

Manipur sorkarin tribal chenna hmun ṭhenkhat reserved forest area tia puang a, an chenna aṭanga a hnawhchhuah aṭangin state chhung boruak hi a ṭha lo ṭan a ni. Tribal-te chuan an chenna hmun aṭanga chhuahtir an nih avanga lungawi lohna pawh an lo lantir tawh bawk. Hemi hnu hian Manipur-a hnam tam ber leh dinhmun ṭha zawk, Meitei hnam hnena Scheduled Tribe (ST) status pek tum a ni chu tribal-te hian duh loin, May 3 khan tribal-te chenna, hill district 10-ah kawngzawh, Tribal Solidarity March’ an buatsaih a, he kawngzawhnaah hian buaina a chhuak a, state chhung hmun hrang hrangah a kangkai zui ta a ni.

VHP-in boruak muanawm siam turin ngen

Vishva Hindu Parishad (VHP) chuan Manipur-a buaina thleng chu ṭha lo an tih thu leh, boruak ṭha leh muanawm a awm an duh thu an sawi.

VHP national secretary general Milind Parande chuan Thawhṭanni khan video message tichhuakin, Manipur-a tualchhung buaina chhuakah khan biak-in chauh hal a ni lo a, temple-te pawh tihchhiat tel a ni tih a sawi. Ṭhenkhatin Kristian-te biak-in chauh beih a ni tiin, mipuiah ngaihdan dik lote an siam a ni, a ti.

Meitei hnamte temple 40 chuang tihchhiat tel a ni tiin,Hindu society-te chu heng temple tihchhiatte siamṭha tura thawkchhuak turin a ngen zui bawk.