Assam police-te thla 3 chhunga inla fit vek turin hriattir

Assam Police chuan police zawng zawngte an taksa fitness siamṭha turin thla thum hun a pe dawn a, thla thum hnuah an Body Mass Index (BMI) record laksak vek an ni dawn.

Director general of police (DGP) GP Singh chuan, he ruahmanna hian IPS leh APS officer-te pawh a huam vek dawn tih sawiin, inlak fit nan hian August 15 thleng hun pek an ni a, hemi hnu hian BMI hi ni 15 chhung enfiah sak zel an ni ang, a ti.

Thla thum hun pek hnuah police zinga thau lutuk, obese category (BMI 30+)-a la awmte chu thla thum dang an ritna tihniam turin hun pek leh an ni ang a, an fitness in hma a sawn loh chuan Voluntary Retirement Scheme (VRS) hnuaiah chawlh tir an ni dawn tih a sawi. He ruahmanna hian taksa lama harsatna benvawn neite erawh a huam lo ang. Assam police-ah hian thawktu hi mi 70,000 vel an awm a ni.

Kar liam ta khan Assam police hotu chuan police zinga zu in nasa leh thau lutuk mi 680 an awm tih a sawi a, heng mite dinhmun pawh hi ennawnin a ṭul dan a zirin voluntary-a chawl tura tih an nih tur thu a lo sawi tawh bawk.