Assam : Sonitpur district-ah curfew puang
Assam-a Sonitpur district-ah Nilaini Ayodhya-a Ram temple sakna tur lungphum phumna hun an hman puala a lawmna kawngzawh buatsaihah buaina a chhuak a, hei vang hian Nilaini zan dar 10 aṭang khan curfew puan a ni.
Sonitpur deputy commissioner Manvendra Pratap Singh chuan Sonitpur district chhunga Thelamara leh Dhekiajuli police station huam chhungah curfew puan a nih thu sawiin, district magistrate phalna lo chuan tumah pawn chhuah phal a ni lo, a ti.
Thelamara-a chengte hian Ram temple lungphum phum lawmna atana Bajrang Dal activist-ten bike rally an neih chu duh loin an lo dodal a ni. Bike rally neite hian music ring taka tiri in Thelamara temple panin kawng an zawh a, tualchhung mite chuan Covid-19 hri leng vanga an buai laia hetianga kawng zawh lo huaihawt hi duh loin an lo khap a ni.
Hei vang hian kawngzawhte leh tualchhung mite hi intibuai zuiin, bike leh motor ṭhenkhat pawh tihchhiat a ni bawk. Police-te chuan buaina chhuak tihreh nan van lam hawiin silaite an hmetpuak a, police eng emaw zat tirh belh an nih hnuah an thunun thei a ni.