Nagaland-in Covid-19 kai in lama awm phalsak

Nagaland sorkar chuan Covid-19 kai tih hriat chhuah, mahse an taksa lama harsatna nei lo, asymptomatic-te chu in lama an in khung hran a, an inenkawl a phalsak.

Sorkar chuan an state-a hri kai hmuh chhuah tam ber chu asymptomatic niin, damdawiina luh ngai kher lo an ni tih a sawi. Hei vang hian hri kai ngaihtuahawm zawkte enkawlna atan damdawiin-te chu ruahman a, health service te dan pangngai ang kalpui chhun­zawm a  ngai tih a sawi. 

Hemi rual hian in lama in enkawl tur te tan, midang nena intlawh­pawh loa room-a inkhung hrang a, bathroom pawh inhmanṭawm loh a ngai tih sorkar kaihhruaina siam chuan a tarlang. Room-ah pawh boruak luhna, ventilation ṭha tak a awm tur a ni. Hei bakah hian in lamah mask leh glove mamawha hman tur a awm reng tur a ni a, fingertip pulse oximeter leh thermometer-te pawh kawl a ngai. Chhungkaw zingah pakhat aia tam Covid-19 kai an awm chuan, hri kaite chu room khatah an awm phalsak an ni thung. 

Covid-19 kai hmuh chhuah, symptom nei lote chuan in lama awm hi district surveillance officer hnenah, an dilna hi village council/town council/municipal council hnenah an pe tel bawk ang. Hemi hnuah medical team chuan an in hi home isolation atan a hman chi em tih an enfiah sak leh dawn a ni. A enfiah turte pawhin mask vuahin, midang nen an  inkhawih tur a ni lo. Ni 14 chhung khung hran a nih hnuah symptom a lan loh chuan ni 14 dang home quarantine leh a ni ang, mahse hemi chhunga symptom a neih erawh chuan Covid hospital-ah dah a ni ang.