Congress-in Manipur-ah observer tir dawn

Congress party chuan Manipur tualchhung dinhmun thlithlai turin observer-te tirh a tum.

Party president Mallikarjun Kharge hoin Thawhlehni zan khan Manipur Congress aiawhte chuan meeting an nei a, tun hnaia tualchhung buaina nasa tak chhuak chungchangte sawiin, boruak awmdan thlithlai tura observer tirh hi an rel a ni.

Kharge chuan Manipur boruak chuan ngai a la awh thei lo tih sawiin, sorkar laipui chuan boruak a pangngai chhoh thuai theihna turin theihtawp a chhuah a ngai a ni, a ti. Hnam hrang hrangte chuan boruak ṭha siam tura hma a lak a ngaih thu a sawi bawk.

Tualchhung buaina nasa tak chhuak a, tharum thawhna thlengte an thunun thei hloh avangin sorkar laipui leh state sorkar chu sawiselin, dan leh thupek kenkawhna kawnga state sorkar a hlawhchham avangin President's Rule puang turin Congress chuan an lo phut tawh a ni.

SC-in status report thar thehlut turin hriattir

Supreme Court chuan Manipur sorkar hnenah, an state-a buaina chhuak chungchangah status report thar thehlut turin a hriattir.

Manipur tualchhung buaina chungchanga petition thehlutute chu Supreme Court hian July thla chawlhkar hmasa bera ngaihtuah turin a dah a ni.

SC chuan buaina chhuak tuarte himna tura hma lak a nih dan te, chhawmdawlna pek a nih dan chungchangahte state sorkar chu status report thar thehlut turin a ti a ni. State sorkar hian status report-ah buaina chhuahna biala cheng mi 46,000 chuang chu chhanchhuah an nih thu leh, an state-a tangkhang mi 3,000 te chu an haw theihna turin airport-ah hruai thlen an ni bawk tih a tarlang.

Internet service titawp chhunzawm zel

Manipur sorkar chuan tualchhung buaina chhuakin ziaawm lam pan zel mah se, internet service tihtawp chu ni nga dang chhunzawm a la ni dawn tih Thawhlehni khan a sawi.

State sorkar chuan thuchhuah siamin, mi ṭhenkhatin social media chu boruak ṭha lo chawh chhuahna atan te, inhuatna lam hawi thlalak leh video thehdarhna atante an hman a hlauhthawnawm avangin, internet service chu tihtawp chhunzawm a ni rih dawn tih a tarlang.

Buaina a chhuah hnuah, May 3 khan mobile internet tihtawp a ni a, May 4-ah broadband titawp a ni leh bawk.

May 19-ah Manipur tan chawngheiin ṭawngṭai dawn

Nagaland-a Council of Nagalim Churches (CNC) chuan Manipur tualchhung buaina thleng chu an dem thu sawiin, May 19 hian Camp Hebron-a Civil Headquarters (CHq)-ah Manipur buainate a reh a, boruak ṭha a awm theih tura dilin chawngheia ṭawngṭaina hun an hmang dawn.

CNC chuan Manipur dinhmun tawn mek leh, Naga political issue chu lo thlir a, lo nghah ngawt chi a ni lo a, thuneitute a taka an chet chhuah a ngai a ni, an ti.