Tripura doctor-ten nawrh huaihawt
Tripura-a doctor pawl pathum, Indian Medical Association (IMA), Agartala Government Medical College (AGMC) Teachers Forum leh All Tripura Association Doctors Association (ATGA) chuan an thawhpui doctor pakhat suspend a nih dana lungawi loin, Nilaini khan Agartala Government Medical College (AGMC)-ah nawrh an huaihawt.
August 2-a health minister hlui leh BJP MLA, Sudip Boy Barman-a'n Shaheed Bhagat Singh COVID Care Centre (CCC) a tlawh ṭuma duty, Dr Uttam Bhattacharjee chu suspend a ni. BJP MLA hi CCC a tlawh chungchangah Covid-19 norms palzutah puh a ni a, West Tripura District Magistrate chuan amah leh midangte himna turin ni 14 chhung sorkarin inkhungna hmun a siamah inkhung hrang nghal turin a hriattir nghal bawk. West Tripura district magistrate, Sandeep Mahatme N chuan MLA hian Ministry of Health and Family Welfare-in Covid Care Centre chungchangah kaihhruaina a siamte palzutah a puh a, centre chhungah hian sorkarin phalna a pek bik leh, damlo te enkawl tura training neite chauh luh theih a ni, a ti.
CCC-a duty, Dr Bhattacherjee hi MLA-in an centre a tlawh tur hi a lo dan loh avangin hrem nia sawi a ni a, hei bakah Agartala khawpui chu thuneitute phalna lo chuan chhuahsan lo tura hriattir a ni bawk.
Doctor-te chuan Dr Bhattarcherjee hrem a nih dan chu a dik lo nia sawiin, a hremna hi sut leh nghal turin an phut. A chunga thuneitute thiltih dan chu medical community pum beihna anga an ngaih thu an sawi.