Thla tharah HNLC inbiakna neihpui a ni ang : Meghalaya CM

Meghalaya chief minister Conrad K Sangma chuan thla thar tir lamah, Hynniewtrep National Liberation Council (HNLC) helpawl chu, inremna kawng zawnga inbiakna neihpui a ni dawn tih a sawi.

Chief Minister chuan Thawhlehni khan deputy chief minister Prestone Tynsong chuan HNLC political secretary, vice chairman leh executive member-te chu informal meeting a lo neihpui tawh a, he hunah hian HNLC-in remna palai atana an ruat PS Dkhar pawh a tel a ni, a ti. HNLC nena official-a inbiakna hi June chawlhkar hmasa berah neih ṭan a ni ang, tiin a sawi bawk.

Sangma chuan HNLC nena inremna siam ngei tumin a kaihhruai sorkar chuan hma a la tih sawiin, "Hun eng emaw chen kan inbepawp tawh a, hma pawh kan sawn zel a ni. Inbiakna neih hunah inremna pawh kan siam theih ngei ka beisei," a ti. HNLC lam thil phut hrang hrangte pawh ngaihtuah vek an tum tih a sawi a, hemi rual hian thil ṭhenkhat erawh chu state sorkarin a tih mai theih loh, sorkar laipui lama thlen ngaite a awm a ni, a ti.

HNLC hian Meghalaya rama cheng hmasa, Hynniewtrep hnam tan independence an sual a, kum 2018 khan sorkar nen inkahhai an lo puang tawh a ni.