Manipur Tribal MLA leh tribal hnam hrang hrangten BJP kaihhruai state sorkar inbiakna neihpui an duh lo

Manipur-a Meitei leh tribal-te inkara buaina chhuak kal zelah, tribal hnam hrang hrang aiawh leh, tribal MLA-te chuan chief minister N Biren Singh kaihhruai BJP sorkar chu inbiakna neihpui an duh lo tih an sawi.

Nilaini khan tribal MLA pariat leh non-Naga tribal organisation hrang hrangte chuan Aizawlah meeting neiin, an state-a tribal-te hmalam hun turte an sawiho a ni. Meeting zawha thuchhuah an siamah, "Tualchhung buaina thleng mekah lungrual taka ṭan ho zel a, Manipur sorkar lai chu eng thilah mah inbiakna neih pui loh a rel a ni," tiin an tarlang. Hemi rual hian tribal dangte pawh inbiakna zau zawk neihpui an rel bawk.

Meeting-ah hian tribal-te himna tura inrelbawlna hran neih a ṭul chungchang pawh an sawiho bawk a ni.

Hemi hma hian tribal MLA 10 chuan sorkar laipui hnenah tirbal-te tana inrelbawlna hran siamsak turin an lo ngen tawh bawk a, an zingah hian BJP MLA 7 an tel. MLA-te chuan tribal-te huatna a nasat chhoh em avangin Manipur hnuaiah an awm ve reng thei tawh lo niin an sawi.