Manipur chungchanga PM ṭawngchhuak duh lo an dem

Congress party chuan Manipur tualchhung buaina chhuah aṭanga ni 15 hnuah pawh prime minister Narendra Modi a la ngawi reng chu an dem tih an sawi.

Congress communication chief, Jairam Ramesh chuan tualchhung buaina chhuak vanga mi tam takin nunna chan a, chenna in leh sakhaw hmun pawimawh ṭhahnem tak hal chhiat a nih hnuah pawh tun thlengin union home minister Amit Shah emaw, union cabinet minister dangin emaw thil awmdan a hmuna thlitlai turin an la tlawh lo, tiin Ningani khan a sawi a ni.

"Buaina chhuah aṭangin ni 15 na a ni a, internet tihtawp a la ni a, ni 5 dang tihtawp chhunzawmna turin thupek an tichhuak leh bawk. Hei vang hian banking, e-commerce, e-bill payment, business, work form home, education leh essential service thlengin tihtawp a la ngai. Hetih lai hian Prime Minister chuan boruak siam ṭha tura ngenna ṭawngkam khat pawh a chhakchhuak lo a, cabinet minister-ten state hi an la tlawh bawk lo a ni," tiin Ramesh chuan a sawi.

Congress party hian Manipur tualchhung dinhmun, a hmun ngeia kala enfiah tur observer team a din tawh a, anni hian thil awmdante an enfiah hnuah report an thehlut leh dawn a ni.