Assam-Meghalaya border-a cheng Khasi-ten Assam lamah beh duh

Assam leh Meghalaya border-a cheng zinga Khasi 10,000 chuangte chuan Assam-a West Karbi Anglong district-a awm an duh tih an sawi.

Assam leh Meghalaya ramri, Assam-a West Karbi Anglong huam chhungah hian Khasi khua eng emaw zat a awm a ni.

United Khasi People's Organisation (UKPO), Karbi Anglong Central Committee chuan Meghalaya deputy chief minister leh Nortiang constituency MLA, Sniawabhalang Dhar chu tun kar tir lam khan hmuin, ramri chungchang buaina chingfel vat turin Assam sorkar lam nen inbe thuai turin a ngen.

Dhar chuan UKPO palaite hnenah, state pahnih ramri chinfelna tur ngaihtuahna inbiak thawh hnihna neih a ni thuai dawn tih a lo hrilh.

UKPO president Pynshngainlang Rattane chuan, Meghalaya lam aṭangin misual ṭhenkhat chu Assam huam chinah lutin, khawtlangah buaina siam zawngin an che fo a, hengte hi tihtawp thuai a ngai tih a sawi.

Dhar chuaan Khasi organisation chu state pahnih ramri huamchhunga cheng, Khasi leh Karbi-te inkara boruak ṭha a awm theihna tura hma la turin a ngen bawk a ni. UKPO hian May 12-a Meghalaya lam aṭanga lutten in pahnih an halna, Khandully khua tlawhin an khaw hotu pawh an kawm a, Meghalaya leh Assam lam mite chu boruak ṭha siam a, inngeih taka awmho theihna tura hma la turin an ngen.