Tripura : CPIM-in Forest Bill thar siam tribal tan a him lo tih an sawi

Tripura sorkarin Forest (Conservation) Amemdment Bill 2023 a siam chu tribal society tan a him lo a, mi hausa leh thiltitheite kuta an ram dahna tur a ni tiin CPIM frontal wing, Tripura Upajata Ganamukti Parishad chuan a sawi.

Joint Parliamentary Committee chairperson Rajendra Agarwal hnenah memoradum thehlutin, Forest (Conservation) Amendment Bill, 2023 hian an hman mek, tribal-te din khawchhuah theihna tura pawimawh, Forest Right Act, 2006 chuan a rawn thlak danglam vek a ni, an ti. Forest (Conservation) Act of 1980, leh Forest Rights Act 2006 te chu inzul taka siam a nih laiin, Forest (Conservation) Amendment Bill, 2023 erawh chuan FRA, 2006-a tarlante engmah rawn sawi zui a nei tawh lo a ni, an ti.

Tribal-te chu hmasang aṭangin forest area-ah an cheng a, hnam hnufual leh chimral mai awlsam tak dinhmunah an ding a, hun harsa leh khirh tak tak an paltlang a ni, tiin Tripura Upajata Ganamukti Parishad chuan a tarlang. An harsatna lian ber chu ram chungchang a nih tih an sawi bawk.

FRA 2006 hnuaiah tribal nuai 1.29-te chu ram neitu nihna pek an ni a, mahse he dan hmanga ram neitu nihna pek theihna tur hi Forest Bill tharah telh a nih loh avangin, an pi leh pute hun lai aṭanga an lo chen tawhna ramte chu development project thawhna atan laksak theih an ni dawn a ni. Hei vang hian GMP chuan thil phut pahnih tarlangin, tribal-te chenna biala project thawh tum a nih chuan Gram Sabha phalna lak phawt a, a biala cheng tribal-te awmna tur hmun leh zangnadawmna pekna tur felfai taka ruahman hmasak phawt an phut a ni.