AP : Human rights group-in APUAPA hman an sawisel

Human Rights Law Network (HRLN) chuan tun hnaia Arunachal Pradesh state puma darkar 72 awh bandh huaihawt a nih ṭuma Itanagar district-a Arunachal Pradesh Unlawful Activities (Prevention) Act 2014 (APUAPA) hman a ni chu an sawisel.

HRNL hruaitu, Gauhati High Court advocate ni bawk Ebo Mili chuan, APUAPA chu sawisel hlawh tak, Unlawful Activities (Prevention) Act 1967 (UAPA) nen inanna tam tak a nei a ni, a ti.

UAPA hi firfiaka chetna leh ram himna tichhe thei zawnga chetna thleng ṭhin do letna atan siam ni mah se, sorkar kuta thuneihna sang tak pek a nih avangin hmang dik loin, sorkar sawiseltu leh an dikna chanvo neih anga thiltitu, activist, journalist leh midangte beih letna atan a hmang fo ṭhin tih Mili chuan a sawi. Hetiang bawk hian APUAPA 2014 chuan state sorkar chu ni 12 chhung hren theihna thuneihna pein, pawhsei phalsak a la ni zui bawk.

He dan sawisel hlawh tak hi AP sorkar hian bandh huaihawtnaa a hman ṭum khatna a ni a, hei hi sawisel loh chuan nidang zelah pawh sorkar hian hmangin, sorkar sawiseltute beih letna atana a hman zel a hlauhawm tih Mili chuan a sawi a, he Act hman dan chungchang hi ngaihtuah nawn leh turin HRLN chuan state sorkar chu a ngen bawk.