Assam -in sorkar school-a thawk zirtirtute tan dress code siam

Assam sorkar chuan state chhung sorkar school hrang hranga zirtirtu, mipa leh hmeichhiate tana school-a an inthuam dan tur, dress code tichhuakin, zirtirtute chu an hnathawhna hmunah jeans leh leggings an hak a khap a ni.

Department of School Education chuan Inrinni liam ta khan dress code chungchanga hriattirna hi tichhuakin, zirtirtute chu school-ah jeans leh leggings bakah T-shirt pawh an hak khap a ni bawk. Hriattirna an tihchhuahah hian, zirtirtute chu kawng hrang hranga zahawm taka awm a, midangte entawn tur an ni tiin, a bikin an hna thawhna hmunah chuan kawng engkimah entawn tlaka an awm a ngai a, hei vang hian dress code siam pawh hi an zawm ngei tur a ni, a ti.

"Zirtirtu ṭhenkhat chu zirna inah thuamhnaw an duh zawng, vantlang hmuh atan pawha zahawm lutuk lo hak mai ching a awm tihte hriat a ni. Zirtirtute chu kawng engkima entawn tlak, an hnathawhna hmunah pawh inpekna, zahawmna leh tih tak takna lantir tura beisei an ni," tiin hriattirna tihchhuahah hian tarlan a ni.

Education Department chuan zirtirtu, mipa leh hmeichhiate chu thawmhnaw fai leh zahawm takin an inthuam tur a ni a, thawmhnaw pawh rawng lar leh midang mit la lutuk a ni tur a ni lo, a ti. Casual leh party dress chu khap tlat a ni tih a sawi. Zirtirtu mipate chu formal dress-in an inthuam tur a ni, T-shirt leh jeans-te an ha tur a ni lo. Zirtirtu hmeichhiate pawh casual dress - T-shirt, jeans, leggings etc te hak khap niin, thawmhnaw zahawm zawk salwar suit/saree/makhel-chador te ha tura tih a ni. Zirtirtute tana dress code siam hi zawm lo an awm a nih chuan an chungah disciplinary action lak theih a ni ang.