Manipur buaina avangin zirlai naupang 4,700 chuangin harsatna tawk

Manipur education minister Th Bashanta Singh chuan an state-a tualchhung buaina chhuak vang hian zirlai naupang 4,747 chu an chenna hmun aṭangin tlanchhiain, relief camp hrang hranga an awm mek tih a sawi.

Minister chuan buaina chhuak vanga harsatna tawk, zirlaite hi Education Department chuan a ngaihven zui zel a, vawiin hian an awmna hrang hrangah lehkha zirna tur hmanrua - notebook, pen, pencil, sports material leh uniform-te sem tum a ni, a ti. Hei bakah volunteer teacher-te chu relief camp-a naupangte coaching class pe turin tirh an ni bawk ang.

Bashanta Singh chuan, zirlai tlanchhia zinga Class 9-12 inkarte chu seat a awm chu an school duh thlanah transfer phalsak an ni dawn tih sawiin, seat a awm tawh loh erawh chuan an bulhnai school dangah an kal theihna turin ruahman a ni ang, a ti. Hmun hla zawka chengte chu distance learning neihpuina turin tablet pek an nih tur thu a sawi bawk.