Meghalaya sorkarin reservation roster panel din Sorkar hna thar lak tur tihtawp rih

Meghalaya sorkar chuan job reservation policy roster system zirchiang tur committee a din a, committee-in report an thehluh hma chu sorkar hna thar lak tihtawp a ni rih ang.

Roster system chungchangah hian kar liam ta Zirtawpni khan all-party meeting neiin, a zirchiang tur committee hi an din a, health minister Ampareen Lyngdoh-in a kaihruai a ni. Chief minister Conrad K Sangma chuan an zirchianna report thehluh a nih hma chu sorkar hna lak chawlhsam a ni rih dawn tih a sawi.

Kum 1972 aṭang khan, Meghalaya sorkar hnuaia hna laknaah Garo leh Khasi hnam tan 40% ve ve dahsak an ni a, an state-a tribal dang awmte tan 5% dahin, a bak 15% chu general category-ah dah a ni.

Hetih lai hian eptu pawl, Voice of the People Party (VPP) chuan reservation policy hi ennawn an phut a, all-party meeting-na aṭangin an chhuak tau zui bawk. May 23 hian an thil phut nawrna atan chaw ngheia nawrh huaihawt an tum.

VPP chuan Khasi hnuaia sub-tribe - Jaintia, War, Bhoi leh Lyngngam-te chu Garo ai pawhin an tam tawh zawk a, state pumah Khasi nuai 16 an awm laiin, Garo chu nuai 10 an tling lo a, hei vang hian reservation in ang pek an nihna hi ennawn a ngai tawh a ni, an ti.