"Buaina chhuak chungchangah inpuh tawn suh u" - Manipur CM

Manipur chief minister N Biren Singh chuan, tun hnaia an state-a tualchhung buaina chhuak chungchangah mipuite chu inpuh tawn lo turin a ti a. Hnam bil anga inpuh loin, sorkar zawk chu puh turin a ti.

Pathiannia Imphal-a Anti-Terrorism Day hmannaa thu a sawiah, Chief Minister chuan an state-a buaina chhuak chu sorkar thiltih dana lawm lohna leh dodalna lantirna aṭanga chhuak a ni tiin, tumah inpuhtawn loin, hnam hrang hrangte an lungawi lohna pawh sorkar hnena thlen ṭhin turin a ti bawk.

CM Singh chuan a kaihhruai sorkar chuan an forest land humhalhna tur leh, ruihhlo laka an fihlimna turin hma a la a, hnam bil bitum bik engmah an nei lo niin a sawi.

Tualchhung buaina chhuak chungchangah sorkar chuan mawhphurhna a la tih sawiin, sorkar muanawm leh nunphung a pangngai leh theihna turin theihtawp an chhuah thu a sawi. State chhung hnam tin chu unau, chhungkua vek an ni a, chhungkaw member-te pawh inhauh changte a awm ve ṭhin a ni, a ti. Hnam tinte'n inunauna leh lungrualna ṭha tak an neih chu an chhawmnun leh a ṭul thu a sawi.

Buaina chhuak leh hlauh vanga mi tam takin an in leh lo chhuahsan a, state danga an tlanchhia chu pawi a tih thu CM chuan a sawi a, state danga tlanchhiate chu hruai kir leh thuai an ṭul thu a sawi. State sorkar chuan Manipur-a an hawna tur ticket man pawh a tum sak dawn a ni, a ti. State mipuite chu hnam dangte elsen leh rilru tina zawnga thuchhuah siam leh rally huaihawt lo turin a ngen bawk.

Tualchhung buaina chhuah hnua union home minister Amit Shah hnena tribal-te tana inrelbawlna hran diltu, tribal MLA 10-te hnenah pawh ngenna a siam a, "Anni pawh kan chhungkaw mi vek an ni. Manipur hi state dangdai tak a ni a, state lian lo tak ni mah ila, hnam hrang hrang, recognised tribe 34-35 vel kan awm a, an zingah hian Kuki pawh an tel. Kan vai hian unau vek kan ni," a ti.

Manipur sorkar chuan Pathianni khan buaina chhuak vanga state puma internet service tihtawp chu ni nga dang a pawtsei leh. Hei hi boruak ṭha lo chhuak thei tur venna atan, social media platform kaltlanga thu dik tawk lo thehdarh ṭhin venna tur a nih thu a sawi.