Meghalaya-in sahuan thar a nei dawn

Meghalaya state chuan August 15 hian sahuan, zoo thar a nei dawn.

Chief minister Conrad K Sangma chuan Ri-Bhoi district-a Meghalaya Zoological Park siam mek chu August 15, Independence Day-ah hawn a ni dawn tih Pathianni khan a sawi. Kar liam Inrinni khan hnathawh dante enfiahin a hmunah a lo tlawh tawh a ni.

Zoo hi peihfel a nih hunah chuan khualzin tam zawk a hip thei dawn a ni. He zoo hi ram hectare 72-a zauah siamin, a siamna senso atan Rs vbc 35 vel sen a ni. "Infrastructure-te pawh zawhfel a ni thuai dawn a. Sorkar laipui leh Central Zoo Authority lam aṭanga phalna kan hmuh hunah, mipui tlawh theih tura hawn a ni ang. A tlawhtute tan facility tam zawk siam kan tum a, trekking path, ropeway, children's park, interpretation centre te pawh zoo huam chhungah hian siam kan tum a ni," tiin CM chuan a sawi.

Central Zoo Authority pawmpuina an hmuh thuai theihna turin, June 30-ah chuan hnathawh tur la awm zawng zawng pawh peihfel vek turin official-te a hriattir bawk.

CM chuan Zoo hawn thar tura ticket hralh, cafeteria, souvenir shop leh food stall bakah vehicle service-te chu tualchhung mite tih tir vek turin a rawtna a thlen nghal bawk a ni.