An pate Naga hnam ni lo hnenah ST status pek theih loh

Nagaland-a Kohima district thuneitute chuan thu chhuah siamin, an pate Naga hnam ni lo (non-Naga father) leh, Naga nu leh pate an nau lak (adopt) pawh ni se Naga hnam ni lo hnenah Scheduled tribe, backward tribe leh indigenous inhabitant tribe certificate pek theih an ni lo, a ti.

He thupek hi kum 2012, June 11-a Nagaland sorkarin thuchhuah a lo siam tawh bawhzuina atan district thuneitute hian an tichhuak leh a ni.

Kohima deputy commissioner Shanavas C chuan thupek hi tichhuakin, Kohima district hnuaia Area Administrative Offcer zawng zawngte hnena zawm vek tur leh, certificate hi pekchhuah a nih hmain a diltute nihna chu enfiah zel turin a hriattir. Hei bakah hian an huamchhunga Village Council leh GB zawng zawng hnenah pawh sorkar thupek hi zawm vek tura hriattir turin a ngen bawk.

Kum 2006 khan Supreme Court chuan tribal hmeichhia leh non-tribal forward class mipa fate chuan Scheduled Tribe status an dil thei lo a, sorkar hnuaia reserved caterogy hnuaiah hna pawh an dil thei lo tih a lo sawi tawh a ni.