Manipur : Imphal East district-ah buaina chhuak thar leh

Manipur tualchhung buainain ziaawm lam a pan chhoh hnuah, Thawhṭanni khan Imphal East district-a New Chekon area-ah buaina a chhuak thar leh. Mahse nimin lamah erawh thil duhawm lo thleng a awm zui lo.

Thawhṭanni khan New Chekon area-ah hian silai keng mi paliten mite vauin, dawr inhawngte chu a khar luih tir a, hei vang hian mipui thinrimin buaina siamin in pahnih an hal a ni. Dawr khar tirtute zingah hian MLA hlui pawh a tel. He thil thleng vang hian security force-te chuan nimin zing khan mipuite chu pawn chhuak lo turin an hriattir a, sumdawnna hmunte pawh khar vek an ni bawk.

Police-te chuan Imphal East district-ah hian tualchhung mite chuan silaiten pawn lam miten an veng an beih tur laka venna turin, 'bunker' te siamin an duty ṭhin niin an sawi. Security force-te chuan Pukhao leh Leitanpokpi-ah 'bunker' panga chu a tihchhiatsak tawh a ni.

Hetih lai hian valley district lamah hmeichhiaten nawrh huaihawtin, sorkar chu Kuki helpawl nena inakhhai, suspension of operation (SoO) an puan chu titawp a, an laka hremna lekkawh zawk turin an phut. Dan loa an rama Myanmar aṭanga lutte chu thawn kir a, hill area-a poppy chinna hmun tihchhiatte phutin, hill MLA-ten state ṭhenhran an phutna pawh an dodal thu an sawi.

Meitei leh tribal-te inkara buaina a chhuah hnuah, state chhungah hian Army leh Assam Rifles sipai 10,000 khat vel an la duty reng a ni. Security force-te chuan unmmaned aerial vehicle leh Cheetah helicopter hmangin boruak awmdan an thlithlai reng a ni.