Assam Human Rights Commission (AHRC) aṭanga hriattirna an dawn angin, Assam-a Kamrup-Metro district thuneitute chuan Guwahati-a Silsako Beel rama chengte hnawhchhuah an nih dan chu chhui chiang turin thupek a tichhuak. 
Silsako Beel-a eviction drive kalpui a nih dan chhui chian hna hi additional district magistrate (ADM) Priyanshu Bharadwaj chuan a thawk ang. Kamrup Metro district assistant commissioner leh executive magistrate, Jyoti Kalita chu a ṭul anga pui tura ruat a ni bawk. Report hi AHRC hnenah an thehlut dawn a ni. 
Kumin February thla tir lam khan Guwahati Metropolitan Development Authority (GMDA) chuan Guwahati-a protected wetland, Silsaklo Beel-a chengte hi a hnawtchhuak a, he hmuna dan loa in sak nia sawi in 250 vel chu tihchhiat a ni bawk. 
Assam sorkar chuan Silsako Beel-a sorkar ram, bigha 1,200 vela zau chu phalna nei loa luah a ni tih a sawi. 
Silsako Beel-a chengte chuan an chenna aṭanga hnawhchhuah an ni leh, an inte ṭhiahsak an nih danah lungawi lohna an lantir a, hnawhchhuah an nih hmain sorkar lam aṭangin hriattirna mumal taka pek an ni lo tih an sawi. Hnawhchhuah zinga pakhat chuan, "BJP vote ni ila chuan hetiang hian kan chungah an ti lo ang. Min tihchhiat vek a, min tihhlum vek hi an tum a ni. Min venghim tura kan thlan lalte an ni a, kan inte min tichhiatsak a, mi tihlum tur ni loin," tiin a sawi. Assam state leilung fa diktak tih sorkar chuan a hre reng chungin, awm na nei loin kawngpuiah, vakvai turin a thehchhuak niin an sawi a ni.