Tripura tourism brand ambassador atan Sourav Ganguly ruat

Indian skipper hlui Sourav Ganguly chu Tripura tourism brand ambassador atan ruat a ni.

Chief minister Manik Saha chuan Indian cricket team captain hlui, Sourav Ganguly chuan Tripura tourism brand ambassador atana ruat a nih thu sawiin, a campaign puina hnuaiah state tourism sector lam pawhin nasa taka hma a sawn chhoh a beisei thu a sawi.

State tourism minister Sushanta Chowdhurty pawhin Ganguly hi meeting a lo neihpui tawh bawk a ni. Minister chuan, "Kan state-in tourism sector lama nasa zawka hma kan sawn theihna turin, brand ambassador ṭha tak, khawvel huap pawha hriat hlawh kan neih hi a ngai a ni. Hemi atan hian 'Dada' (Ganguly) aia ṭha dang hi an awm lo. Indian international cricket team captain hlui hian khawvel huap pawhin follower tam tak a nei a ni," a ti.

Tripura tourism ambassador atana Ganguly ruat a ni tih puan a nih hnu lawkah, West Bengal-a Hugli-a BJP office-ah an lo lawm a, sweet-te an sem a, hei hian sawizui pawh a hlawh phah hle. Ganguly hi kum 2019 chho khan politics luhchilh a tum nia sawi thawm awmin, BJP nen sawizawm a ni a, mahse a hnuah Mamata Barnerjee nena meeting an neih vangin TMC nen sawizawm a ni leh bawk. Tuna Tripura-a BJP sorkarin brand ambassador atana a ruatna a pawm avang hian BJP lamin thawm an nei ve leh a, mahse hei hi a lamhnai leh chhungte chuan sawiselin, mi lar dang tam tak pawh brand ambassador atana ruat an nihin politics nena sawizawm an ni lo a, Ganguly a nih avanga an sawizui chu thil lawmawm lo tak a ni tih an sawi.