Meghalaya : June-ah HNLC inbiakna neihpui dawn

Sorkar laipui, Meghalaya sorkar leh Hynñiewtrep National Liberation Council (HNLC) helpawl chuan June thla chawlhkar hmasa berah inremna kawng zawngin inbiakna an nei ṭan dawn.

HNCL hian press conference an neihah sorkar lam aiawhte nena inbiakna an neih tur thu hi an sawi. Hemi rual hian state leh sorkar laipui chuan an pawl member-te ngaidam tura an ngenna chu an remtih loh chuan, remna zawnga inbiakna chu kalpui theih a ni lo ang, an ti.

Press conference-ah hian an pawlin remna palai hna thawk tura a ruat Sadon Blah bakah vice chairman, Manbhalang Jyrwa, Political Secretary Aristarwell Thongni, Storgy Lyngdoh leh Raymond Lapang-te an awm a ni. Blah chuan meeting hmasa berah inkahhai puan chungchang sawiho phawt a ni dawn a, a tahtawla an thil phut chungchangte pawh sawiho zel a ni dawn tih a sawi.

Blah chuan a hmain inbiakna hi official ni lem loin ṭum li vel an lo nei tawh tih a sawi a, hetah hian hmaichhana inbiakna neih a nih theihna tura HNLC hruaitute India ramah him taka an rawn luh theihna tur chungchangte pawh sawiho a ni, a ti. Hemi atan hian thuneitu lam pawhin ruahmanna an siam tawh a, mahse an pawl member zawng zawng ngaidam tura an ngenna erawh chu meeting hmasa berah sawiho a ni dawn tih a tarlang bawk.