Meghalaya : VPP hotuin chaw ngheia nawrh huaihawt

Meghalaya-a eptu pawl, Voice of the People's Party (VPP) hotu Ardent Basaiawmoit chuan state sorkar chu 1972 reservation policy ennawn turin a phut a, a thil phut nawrna atan hian Thawhlehni aṭang khan tiam chim awm loin chaw a nghei.

Kum 1972 aṭang khan Meghalaya-ah hian state sorkar hnuaia hna laknaah Garo leh Khasi hnam tan 40% ve ve dah a ni a, state chhung tribal dang awmte tan 5% dahin, general category-ah 15% dah a ni bawk.

Basaiawmoit chuan Khasi hnam peng - Jaintia, War, Bhoi leh Lynggnam-te pawh Garo aiin an tam zawk tawh tih a sawi a, hei vang hian job reservation policy hi siamṭhat a hun tawh hle tih a sawi.

2011 Census-a tarlan danin, Meghalaya-ah hian Khasi hnam hi nuai 14.1 chuang an awm a, Garo hi nuai 8.21 vel an awm bawk. Hei vang hian reservation in ang pek hi dik tawh lo tiin VPP president chuan a sawi. Hemi rual hian Garo hnamin sorkar hna an luhna tura an chanvo neihte chu a dodal sak lo a, reservation policy ennawn leh siamṭhat chauh chu a thil phut a nih thu a sawi nghal bawk.

VPP hian member 60 awmna Meghalaya assembly-ah hian MLA pali an nei a ni.