Union Home Minister Amit Shah-a'n Assam a tlawh: Manipur aia Assam a tlawh hmasak vangin Congress-in dem

Union home minister Amit Shah chuan Ningani khan Assam a tlawh a, Assam sorkarin sorkar hna thawktu a lak thar, mi 44,703-te hnena appointment letter semna programme buatsaih a hmanpui.

Amit Shah hian Srimanta Sankardev Kalakshetr-a National Forensic Science University sakna tur lungphum a phum nghal bawk.

Assam sorkar hnuaa appointment letter 44,703 lai a sem chhuah hnua public meeting a neihnaah, Shah chuan Narendra Modi chu a zawnin term thum Prime Minister a ni ngei dawn a, Congress chuan nakkum inthlanpuiah tuna Lok Sabha-a an seat neih zat pawh hi an nei pha tawh dawn lo niin a sawi.

Amit Shah chuan, "Nakkumah Narendra Modi hi seat 300 chuang nen Prime Minister a ni leh dawn. Congress hian opposition party an nihna pawh hi an hloh tawh a, tuna Lok Sabha-a an seat neih zat hi inthlan lehah chuan an hauh pha tawh dawn lo", a ti. Congress party chu rilru diklo puah puhin, Parliament building thar May 28-a PM-in a hawn tur pawh politics khelhna remchangah lain President hawn tir turin an nawr a ni, a ti. Congress leh opposition sorkarna state dangah pawh governor ni loin, chief minister leh Congress hruaitu Sonia Gandhi leh Rahul Gandhi-te pawhin assembly building thar lungphum hi an lo phum fo tawh ṭhin tih sawiin, Congress chu Parliament chhunga Prime Minister thu sawi tir duh loah a puh bawk. "Mipui thlan tlin Modi zah loh hi a thlang tlingtu mipui zah lohna a ni," a ti.

Shah chuan kum 2021 assembly inthlan hma khan, BJP chuan Assam-ah sorkar hna nuai 1 lak thar a lo tiam tawh a, kum hnih leh a chanve chhungin mi 86,000-te hnenah sorkar hna hi pek a ni tawh a, a bak la awm hi thla ruk chhungin pek leh an ni ang, a ti bawk.

Assam a tlawh hmasak vangin Congress-in sawisel

Congress hruaitu Jairam Ramesh chuan union home minister Amit Shah chu tualchhung buaina thlen mekna, Manipur tlawh loa Assam state tlawh hmasak zawk a thlan avangin a sawisel.

Manipur-ah hian May 3 aṭang khan tualchhung buaina chhuakin nunna chan eng emaw zat an awm tawh a, in leh sakhaw hmun pawimawh tam tak hal niin, mi tam tak himna zawngin an tlanchhe bawk. Buaina chhuak hian ziaawm lam pan chho deuh tawh mah se, boruak a la pangngai lo a ni.

Hmarchhak state pakhatin ni 22 chhung zet buaina an tawh hnuah, hmarchhak bial lama zin chhuak Home Minister-in Imphal aia Guwahati a tlawh hmasa zawk chu thil awm lo tak a nih thu Ramesh chuan a sawi. Hemi rual hian, "Karnataka inthlan dawn vanga rally vawi 16 leh road show ṭum 15 nei thei, mahse Manipur-a buaina nasa tak chhuak tuartu mipuite tana hun pe hman lo union home minister tho kha a ni e," a ti.

Congress hruaituin Amit Shah a demna thu a twitter-a a post hnu lawkah, union home minister hian May 29-ah Manipur a tlawh dawn tih sorkar lam thuchhuak chuan a tarlang zui ve nghal bawk.