Tripura sorkarin a hnathawkte hun vawng dik turin chah

Tripura sorkar chuan sorkar hnathawkte chu office kal leh haw chungchangah hun vawng dik turin a chah a; dan zawm lote chungah hremna na tak lekkawh a ni dawn tih a sawi.

General adminis­tration department secretary Abhishek Singh chuan Ningani khan thuchhuah siamin, sorkar department hrang hrang, office leh public sector-a thawkte chuan hun vawn dik leh kal ṭhat lamah sorkar beisei an pha lo hle a ni, a ti. Hei vang hian sorkar hnathawk zawng zawngte chu office kal ṭha tur leh hun vawng dik tura hriattirna a chhuah a ni.

Hriattirna tih­chhuahah hian, sorkar hnathawkte chu a hun taka office thlengin zing dar 10-ah mipuite dawr theih turin an inpeih vek tur tih a ni. Dar 10 leh dar tlai 5:30 inkarah chhan ṭha tak emaw, loh theih loh thil emaw a nih loh chuan office an chhuahsan tur a ni lo. Ṭul bik thila office chhuahsan turte pawhin an pute hnen aṭangin phalna an lak hmasak zel a ngai bawk ang.

Hnathawh hun vawn dan tur chungchanga sorkar thuchhuak zawm lote chu department-in a ṭul angin an chungthu a ngaihtuah ang. Department tin hotute chu sorkar thuchhuak hi khauh taka kengkawh tura ngen a ni bawk.