Kohima-ah NSF office suasam a ni

Nagaland khawpui, Kohima-a Naga Students' Federation (NSF) headquarters, Naga Club Building-a awm chu tu tih hriat lohten Inrinni khan an suasam.

Office hi zing dar 4:30 velah suasam a ni tih hriat a ni a, zing dar 3 vel aṭang khan misual hian an khawih ṭan nia rin a ni.

NSF president Kegwayhun Tep chuan he thil thleng avanga hrehawm an tihzia a sawi a, "He In hi Naga mipui zawng zawng tan in a ni a, Naga hnam rohlu a ni," a ti. Kohima North Police station ah FIR thehluh a ni tih sawiin, dan kengkawhtuten chak taka hma an lak ngei a beisei thu a sawi.

Naga Club building-ah hian NSF leh All Nagaland College Students' Union (ANCSU) te chuan Kohima Press Club (KPC) tana room dah chu office-ah an in luah ṭawm a ni. Hei bakah hian, building chhunga awm dawr pali leh printing press pahnih tihchhiat tel a ni bawk.

Kohima Additional SP Relo T Aye chuan NSF lamin FIR an thehluh chu bawhzui nghal a nih thu leh investigation pawh ṭan nghal a nih thu a sawi. Investigation ti tur hian member pali awmna Special Investigation Team (SIT) din niin, SP hian a ho nghal a ni. Police-te chuan misualten office suasam nana an hmanraw hman ṭhenkhat te chu an hmu let tawh.

Nagaland chief minister Neiphiu Rio pawhin he thil thleng pawi a tihzia thu twitter kaltlangin a sawi a, "Kohima-a NSF and ANCSU office leh dawr ṭhenkhat suasam a ni hi na takin ka dem a ni. Mimal leh vantlang thil inzahsak hi mitinin kan tih tur pawimawh tak a ni. Khua leh tuite remna leh muanna vawng nung tlat turin ka ngen tak zet a ni" a ti.