Imphal-a dawr haltua puh RAF mi leh sa 3 man an ni

Manipur police-te chuan Imphal valley-a sa dawr hala puh, Rapid Action Force (RAF) mi leh sa pathum an man. RAF-te hi Manipur tualchhung buaina chhuak punlun tur veng tura dah an ni.

RAF mi leh sa pathumte leh tualchhung mi pakhat te chu car-a kalin sa dawr hi an hal nia sawi a ni. Veng mipuiten he thil hi an hriat veleh theihtawp chhuahin dawr kang hi an ṭhelh zui a ni.

Thuneitute lam chuan Meitei leh Kuki hnam inkara tualchhung buaina a chhuah laia hetiang thil a thleng hi an ngai thutak hle. RAF chuan mi pathumte hi an hna aṭanga suspend nghal niin, an chungchang ngaihtuah a nih chhung chu Manipur-a battalion headquarters-a lo awm rih turin a hriattir.

Police-ten thu an zawhfiannaah heng mi pathum te hian, an tum vang renga sa dawr hi hal an nih loh thu leh, thosi hlo an halna lamah sa dawr hi a kangkai niin an sawi. Manipur police-te hian he thil thleng avang hian FIR an la thehlut lo.

Hetih lai hian, Chief of Army Staff (COAS), General Manoj Pande pawh ni hnih cham turin Inrinni khan Manipur a thleng a, a cham chhungin hmun hrang hrang tlawhin tualchhung buaina thlen dante chiang zawka hre turin tualchhunga commander-te a kawm ang. General Pande hian boruak ṭha a awmna tura thawk mek, Indian Army, Assam Riffles leh security force dangte pawh a kawm dawn bawk a ni.

General Pande hian Inrinni tlai khan Manipur governor Anusuiy Ukey hmuin, nimin khan chief minister N Biren Singh leh chief security advisor Kuldiep Singh-te nen tualchhung dinhmunte thlirin, a rang lama buaina chinfel a nih theih dante an sawiho bawk.