AASU-in English-a science leh maths zirtir tur duh loin thla khat chhung state pumah lungawi lohna lantir dawn

All Assam Students' Union (AASU) chuan Assam sorkarin sorkar school-a Class 6 chinah Mathematics leh Science subject English-a zirtir tura a tih chu duh loin, thla khat chhung lugawi lohna an lantir dawn.

AASU hian Inrinni liam ta aṭang khan lungawi lohna hi lantir ṭanin, June 27-ah an titawp dawn tih AASU president (in-charge) Utpal Sarma leh secretary Sankarjyoti Boruah-te chuan an sawi.

Zirlai pawl chuan thuchhuah siamin, " Sorkarin mathematics leh science subject-te English-a zirtir tura a ti hi kan duh lo a ni. Hei hi Assamese, Bodo leh tualchhung ṭawng dangte humhalhna kawnga hmalakna a tiderthawng thei a ni. Nikuma he policy a puan aṭang khan, zirlai pawl chuan kan duh loh thu kan la sawi reng a ni," an ti.

Sorkar chu a thutlukna siam tawh sut turin Inrinni aṭanga chhiarin thla khat, June 27 thleng hun an pe. An thil nawr chungchangah vawiin hian state teachers' assocation chu meeting an neihpui dawn a, Thawhlehniah AASU regional committee member-te chuan darkar 10 chaw an nghei ang. June 6 hian Guwahati-ah 'gana satyagraha' an nei dawn bawk a ni.

AASU chuan sorkar school-a zirlaiten English an thiam chu a pawimawh tih an hriat thu sawiin, English-a nal taka an ṭawng theih dan tur ngaihtuah zawk turin sorkar chu an ngen bawk.