PM Modi-a'n hmarchhaka Vande Bharat Express hmasa ber a vailiam

Prime minister Narendra Modi chuan nimin khan virtual-in hmarchhak biala Vande Bharat Express rel hmasa ber, Guwahati leh West Bengal-a New Jalpaiguri inkara tlan tur chu a vailiam.

Prime Minister hian Guwahati station aṭanga rel tlan chhuak tur chu screen-a flag hring vaiin a vailiam a ni. Guwahati station-a hun hman hi railway minister Ashwini Vaishnaw, Assam governor Gulab Chand Kataria leh chief minister Himanta Biswa Sarma-ten an telpui a ni.

PM Modi chuan, Vande Bharat Express hian zirna, insumdawn tawnna, hna lakah leh tourism-ahte nasa takin hmasawnna a thlen dawn tih a sawi a, Assam leh West Bengal inkalpawhna ṭha leh zual a siam dawn a ni, a ti. Kum kua chhungin hmarchhak biala state tinah rel hmanga inkalpawhna tihhmasawn a ni tih sawiin, Modi chuan hmasawnna hna hi thlei bik nei loa thawh a ni a, hei hi khawtlang inrelbawlna ṭha leh thlei bik neilo sorkar hlimthla a ni, a ti.

Guwahati leh New Jalpaiguri inkara tlan tur Vande Bharat Express hian darkar 5 leh a chanve hun a hmang dawn a, tuna hemi inkara rel tlan tir mek hian darkar 6 leh a chanve hun a hmang a ni.

Prime Minister chuan kilometre 182-a sei, DEMU/MEMU electric rel kawng, Lumding, Assam-a awm chu a hawng nghal bawk.