Pawikhawihtu hel 40 dawn thah an ni tawh : Manipur CM

Manipur chief minister N Biren Singh chuan an state-ah security force-ten beihpui an thlaknaah an invenna lamah hel 40 vel thah an ni tawh tih a sawi.

Chief Minister chuan civil mite laka ralthuam cheleka, bei ṭhinte lakah security force-te hian beihpui an thlak mek thu a sawi. Hel 40 kahhlumte pawh hi civil mite silai hmanga beih leh, in halsaknaa inhmahnawihte an ni tih a sawi.

Union home minister Amit Shah-a'n Manipur state tlawh a tum mek laiin, nimin zing khan Imphal Valley hmun hrang hrangah buaina a chhuak leh a ni. Mahse CM chuan heng buainate hi chibing inkarah ni loin, Kuki hel leh security force-te inkara chhuak a ni tih a sawi bawk. Pathiannia hel leh security force-te inkahna thlengah mi panga an thi a, an zingah hian police pakhat a tel nia sawi a ni bawk.

Amit Shah zin dawn vang hian security force-te chuan state chhung boruak muanawm a awm theihna tura hma lain, Imphal Valley leh a chhehvel district-ah ralthuam kawlte dapin beihpui an thlak a ni.

Tualchhung buaina a chhuah hnuah Manipur-ah hian Indian Army leh Assam Rifles sipai 10,000 chuang duty tir an ni a, buaina punlun zel tur venna atan mobile internet service pawh titawp chhunzawm a la ni bawk.

Singh chuan mipuite chu security force-te chetvelna tibuai zawnga awm lo tura ngenin, sorkarah rinna nghat ngam a, security force-te chu lo thlawp turin a chah.