Nagaland-a khawsa Gorkha-te 'indigineous non-Naga local residents'-ah puang

Nagaland sorkar chuan Nagaland-a khawsa Gorkha-te chu Nagaland tana an hnathawh; a bikin Nagaland khawpui Kohima ṭhanlenna kawnga an thawh ṭhat avangin 'indigineous non-Naga local residents'-ah a puang.

Nagaland Governor La Ganesan chuan Pathiannia a puala Gorkha Public Panchayat Kohima-in programme an buatsaih a hmanpuinaah he thu hi a sawi a ni.

Governor chuan apuala Reception Programme an buatsaih chu lawmawm a tihzia sawiin, "Kohima-a khawsa Gorkha-te hian he hnam tan hian nasa takin tha leh zung an lo thawh tawh ṭhin," a ti. Nagaland-a khawsa Gorkha te, a bik takin Kohima-a chengte chu Angami-ho awmna lamah kum 200 dawn lai an lo khawsa tawh tih a sawi bawk.

Nagaland-a Gorkha-te inbengbel dan sawiin Governor chuan, British-in India a awp hnua pem an nih a rin theih tih a sawi. Ei leh in, sakhuana, huaisenna, inngaihtlawmna, rinawmna leh thawhrimna lamah Naga hnamte nen an inang hle a, hei hian Gorkha-te hi an awmna hmun apiangah khawtlang tana ṭangkai leh chhenfakawm nih an tumzia a ti lang a ni, a ti.

Indopui II hma lamah chuan, Gorkha mi tam zawkte chu Naga Hills headquarter, Kohima lamah dah an ni a, mize ṭha leh nelawm tak nei Gorkha hnamte hian Naga hnam hrang hrangte nen inlaichinna ṭha leh inthianṭhatna an siam thiam hle tih Governor chuan a sawi. Naga-te leh Gorkha-te inkarah inlaichinna leh inṭhianthatna ṭha tak a awm chhunzawm zel a beisei thu leh, khua leh tui ṭha tak nia ram leh hnam hmasawnna tura theihtawp chhuah zel turin a chah a ni.