Union Home Minister Amit Shah-a'n Manipur a tlawh

May 3-a Manipur tualchhung buaina nasa tak a chhuah hnuah, a ṭum khatna atan union home minister Amit Shah chu ni li cham turin Thawhṭanni zan khan Manipur a thleng.

Amit Shah hian a cham chhungin buaina chhuah nasatna hmun - Churachandpur, Kangkokpi leh Moreh-te a tlawh dawn a ni.

Home Minister hi union home secretary Ajay Kumar Bhalla leh, Intelligence Bureau director Tapan Kumar Deka-ten an ṭawiawm a ni. Imphal a thlen hnuah chief minister N Biren Singh leh minister dangte chu meeting a neihpui nghal a, nimin tlai khan governor Anusuiya Ukey a hmu bawk.

Shah chuan nimin zing khan Metei hnam civil society organisation hrang hrang aiawhte a hmu a, Manipur-a boruak ṭha a awm a, nunphung pangngai an zawh leh theih dan turte an sawiho a, inkawmna hlawhthlak tak an neih thu a sawi. Churachandpur-ah Kuki leh tribal pawl dang aiawhte a hmu leh dawn bawk a ni. Minister hian Meitei leh tribal-te inkara buaina chhuak vanga hliam, damdawi-ina enkawl mekte pawh a tlawh bawk ang.

Tualchhung buaina chhuak vanga thi chhungte chu zangnadawmna, Rs nuai 10 pek an ni dawn a, sum pek tur hi state leh sorkar laipuiin 50:50 in an intum sem ang. Hei bakah hian thi chhungte hnena sorkar hna pek dan tur pawh ngaihtuah mek a ni bawk. Tualchhung buaina chhuakah hian mi 75 chuangin nunna an chan tawh a ni.

Manipur-a a cham chhungin Amit Shah hian sorkar laipuia tribal-te tana inrelbawlna hran pek phuta memorandum thehluttu, Kuki MLA-te pawh a hmu dawn nia sawi a ni.

Meitei leh tribal-te inkara buaina a chhuah tirh khan, Imphal Valley-a security force-te silai 1,000 leh silai mu tam tham tak chu Meitei pawlten an 'ruksak' a, a hnu May 27-28 khan silai 1,000 chuang an la leh bawk nia sawi a ni. Churanchandpur police station aṭangin Kuki pawl ṭhenkhatin silai an ruchhuak nia sawi a ni bawk. Hetih lai hian thuneitute chuan security force-te silai rukchhuah zinga 500 vel chauh hmuh let a la ni tih an sawi.