Tripura-in hmeichhe bil awmna paramilitary battalion nei dawn

Tripura chief minister Dr. Manik Saha chuan hmeichhe bil awmnna battalion, Tripura State Rifles (TSR) siam a ni dawn tih Thawhṭanni khan a sawi.

Chief Minister Saha chuan battalion thar an din tur hi Tripura state chhunga hmeichhiate tihhmasawnna tur a ni tih sawiin, he thutlukna hi prime minister Narendra Modi leh senior minister dangte pawhin ṭha an tiin an thlawp a ni, a ti.

Tripura sorkar hian a hmain TRS battalion pahnih siam thar a, hmeichhiate tan post 10 dah a lo rel tawh a ni. Mahse hei hi thlak danglamin, hmeichhe bil awmna tur battalion siam hi a tum leh zawk a ni.

TRS battalion khatah hian sipai 1,000 awmin commandant, Tripura Police Service-a superintendent of police rank puiin a ho ang.

Dr. Saha chuan state chhung health infrastructure tihchangtlunna tur, Tripura Medical Tourism Policy pawh tlangzarh a ni thuai dawn tih a sawi. "Damdawiin lam tihchangtlun nan theihtawp chhuah a ni dawn a, hetih lai hian AYUSH lam pawh ngaihthah a ni dawn lo. State chhunga hmun hrang hrangah Ayurvedic park siam a ni dawn. He policy hnuaiah hian Naturopathy leh Panchakarma centre pawh hawn belh zel a ni ang," a ti.