Manipur; Home Minister-in ni 15 chhung boruak muanawm siam turin ngen

Tun hnaia tualchhung buaina nasa tak chhuahna, Manipur state-a cham mek, union home minister Amit Shah chuan nimin khan Churachandpur district-ah Kuki society group hrang hrang aiawhte a hmu.

Home Minister chuan tualchhung buaina thleng mek chinfel a nih theihna atan, Kuki society group-te chu ni 15 chhung boruak ṭha leh muanawm siam turin a ngen. Sorkar laipui chuan buaina thleng chhui chiang turin judicial commission a ruat dawn a, team hran ve vein Imphal leh Churachandpur district an tlawh dawn a ni, a ti. Kuki pawl lam pawhin Minister ngenna hi zawm an tum thu an sawi a, hemi rual hian hemi chhunga beih an nih erawh chuan, mahni venna atana an chet ve a ngai dawn tih an sawi bawk.

Amit Shah hian Kuki pawlte chu an silaite thehlut turin a ngen a, mahse Indigenous Tribal Leaders Forum (ITLF) general secretary Muan Tombing chuan an silaite chu licence nei vek, invenna atan kawl a nih thu leh, Meitei pawl - Aarambai Tengngol leh Meitei Leepun-ten police-te silai tam tham tak an neihsak chu an thehluh ve hma chuan, anni pawhin an silaite chu an pek luh theih loh tur thu minister hi an hrilh tih a tarlang.

Shah hian nimin vek khan Moreh leh Kongpokpi a tlawh bawk a, tualchhunga pawl leh civil society organisation hrang hrang aiawhte a hmu a, Imphal-ah security review meeting a nei leh. Thawhlehni khan Imphal-ah Meitei pawl aiawhte meeting a neihpui tawh bawk a ni.

Manipur infiammiten ngenna thehlut

Manipur-a international leh national award dawngtu infiammi 11-te chuan an state-a cham mek, Amit Shah hnenah Thawhlehni khan memorandum an thehlut.

Infiammite chuan an state buaina chu chingfel a, Manipur impumkhatna chu venhim sak turin an ngen. An ngenna tihlawhtling tura minister-in a tiam thei lo a nih chuan, India sorkarin chawimawina a lo pek tawhte chu pek let an tum thu an sawi. Hun lo kal zelah pawh India aiawhte tel tawh loh leh, midang pawh training pek tawh loh an tum thu an sawi bawk a ni.

Home Minister hnenah memorandum thehluttu zingah hian L Anita Chanu (Dhyan Chand awardee), N Kunjarani Devi (Padma Shri), L Sarita Devi leh W Sandhyarani Devi (Padma Shri awardees) bakah S Mirabai Chanu (Padma Shri and Rajiv Gandhi Khel Ratna awardee)-te an tel.

AICC team-in President Murmu hmu

All India Congress Committee (AICC) team chuan Thawhlehni khan president Droupadi Murmu hmuin, Manipur-a chi leh chi inkara buaina thleng chu inbiakna hmanga chinfel dan ngaihtuah tur leh, tun hnaia tualchhung buaina nasa tak chhuak chhuichiang turin Supreme Court judge hlui kaihhruai, high-level inquiry commission din an phut.

AICC team hi party president Mallikarjun Kharge-a'n a ho a, member pariat an awm a ni. President Murmu hnenah hian memorandum an thehlut a ni. Manipur-a boruak ṭha leh muanawm a awm theihna atana hmalakna chu an thlawp thu an sawi bawk.