Meghalaya sorkar-in school chawlhsante hnuhkir nan NIOS thawhpui dawn

Meghalaya sorkar chuan school chawlhsan, dropout tawhte zirna an chhunzawm leh theihna turin, Thawhlehni khan National Institute of Open Schooling (NIOS) thawhpuina tur thuthlung a ziak.

Education department-in a chhinchhiah danin, India ramah school dropout tamna ber state chu Assam niin 31% an awm. Tripura-in 29.8% neiin an dawt a, Meghalaya hi pathumna niin secondary level (Class 9 - 12) dropout 27.9% an nei a ni.

Meghalaya sorkar chuan "Out of School Children (OoSC)-te hi zawnchhuaha, NIOS Study Centre-a an zir chhunzawm theih dan tur kawng dapna turin Samagra Shiksha hotute leh NIOS chu thawhpuina turin inremna hi a ziahpui. 'Samagra Shiksha’ state project director Swapnil Tembe leh NIOS chairperson Saroj Sharma-ten MoU hi an sign a ni.

Tun dinhmunah Meghalaya hian district pangaah NIOS study centre 25 a nei a, East Khasi Hills, West Jaintia Hills, Ri-Bhoi, East Garo Hills leh West Garo Hills district-ah te centre neiin, district pasarihah centre a la nei lo thung.

Tembe chuan district tina centre neih a nih theih nana hma la turin NIOS hotute a ngen. State project office chuan chanchinbu leh Radio-ahte school kal tura inzirtirna tichhuak tura hma lak a nih thu sawiin, road show pawh buatsaih a ni ang, a ti.