Agartala leh Chittagong inkarah thlawhtheihna service dawn

Tripura khawpui Agartala-a Maharaja Bir Bikram (MBB) airport leh Bangladesh-a Chittagong khaw inkara thlawk tur, international flight chu June 26 aṭangin service ṭan tura beisei a ni.

Argatala - Chittagong thlawhtheihna service hi June 1 aṭanga thlawk ṭan tura ruahman a ni a, technical lamah harsatna a awm avangin service ṭan hun hi sawn hlat a nih thu Airport Authority of India official chuan a sawi. AAI official chuan, "Immigration counter-te chu hman theih tura peihfel ni tawh mah se, international flight-ah chuan security uluk leh zual a ngaih avangin inpuahchah ṭhat a ngai a, hei vang hian service ṭan hun hi tihkhawtlai a ni," a ti.

Spice Jet chuan MBB airport hotute chu an hun tiam, June 26 hma ngeia inpuahchah zo fel hman tura ngenin, an thlawhtheihna service ṭan hun an nghahhlelh thu an sawi.

Agartala leh Bangalore inkarah direct flight service a ni dawn bawk a; Tata company hnuaia awm Vistara airline a thlawk dawn a, June chawlkar thumna aṭanga service ṭan turin ruahmanna siam a ni.

AAI official chuan Tripura sorkar chuan Aviation Turbine Fuel-a VAT an lak ṭhin an tihhniam avangin, airport dangte aiin MBB airport ah hian fuel man a tlawm zawk a, hei hian thlawhna service company-te a hip a ni, a ti.