Manipur Police hotu lu ber thlak a ni

Manipur tualchhung buaina thleng vanga union home minister Amit Shah-a'n a tlawh hnuah, Manipur police hotu lu ber, director general of police (DGP) P Doungel chu thlakin a aiah IPS officer Rajiv Singh chu nimin khan ruat a ni.

Ministry of Home Affairs chuan nimin khan DGP thlakna official order a tichhuak a ni. DGP thar Rajiv Singh hi Tripura cadre a ni a, special case-in a hna hi kum thum chelh tura tih a nih thu order-ah tarlan a ni bawk. Singh hi Delhi-a CRPF headquarters-a inspector general of operations nilai a ni.

Singh-a'n a thlak, P Doungel hi 1987 batch IPS officer niin, tun thla tawpah pension tur a ni a, a pension hma chu Officer on Special Duty (Home)-ah a awm ang.

Manipur tualchhung buaina a chhuah hnu hian sorkar laipui chuan Manipur sorkar security adviser turin CRPF hotu hlui, Kuldiep Singh a lo ruat tawh bawk.

Amit Shah-a'n ralthuam thehlut turin ngen

Union home minister Amit Shah chuan nimin khan Manipur-a silai leh ralthuam dang la kawlte chu police-te hnenah thehlut turin a ngen nawn leh.

Amit Shah chuan vawiin aṭangin police-ten beihpui an thlak ṭan dawn a, silai kawl hmuhte chungah action na taka lak a ni dawn tiin, state chhungah boruak ṭha a awm theihna atan hma la turin pawl hrang hrangte a ngen a, thuthangte awih mai lo a, thudik tak hriatchhuah hmasak tum zel turin a chah.

Minister chuan state chhunga pawl hrang hrangte meeting a neihpui a, anni bakah police offier, political party leh Kuki leh Meitei civil group aiawhte pawh a kawm bawk. Buaina thleng chhuitu tur panel chu high court chief justice rank kaihhruaina hnuaiah dinin, sorkar laipuiin a chhui dawn a ni, a ti. Hei bakah hian Manipur Governor kaihhruaina hnuaiah peace committee din a nih tur thu a sawi bawk.

Bishnupur-a inkahna thlengah police 3 hliam

Tualchhung buainain ziaawm lam a pan chho mek nia sawi laiin, Nilaini zan khan Bishnupur district-ah police leh helho inkapin, police pathumin hliam an tuar niin official-te chuan an sawi.

Inbeihna thlenna hmun hi Kumbi police station hnuaiah Tangjeng hmunah a ni a, police hliam tuarte hi Imphal hospital-ah dah nghal an ni.

Official chuan Nilaini zan vek khan Imphal East district-a Chanung-ah inkahna a thleng nia report a awm thu sawi bawkin, hliam leh thi erawh an awm lo nia hriat a ni, a ti.