AP-a km 2500-a thui highway siam phalna MoRTH-in a pe : CM Khandu

2nd June, 2023

Arunachal Pradesh chief minister Pema Khandu chuan chanchinthar lakhawmtute a kawmnaah, Ministry of Road Transport and Highways (MORTH)-in Arunachal Pradesh-a kawngpui thar, km 2,500 siam phalna a pek thu a sawi.

Chief Minister chuan, BJP-in kum kua sorkarna a chelh chhunga hmarchhak state-a hmasawnna a tam thu sawiin, a bik takin Arunachal Pradesh-ah hmasawnna nasa tak a thleng a ti. State annual budget kum 2014-a Rs vbc 12,000 chu tunah chuan Rs vbc 30,000 chuang a ni tawh tih sawiin, budget pung avang hian infrastructure leh digital connectivity-ah an state chu a ṭhan nasat thu a sawi bawk.

MoRTH-in kawngpui km 2,500-a thui siam a phalsak zingah hian West Kameng aṭanga Vijaynagar thingtlang leh hmun dang pawh tur km 1500-a thui a tel bakah, district hrang hrang paltlang tur km 1000-a thui highway a tel. Public Works Department (PWD), Border Roads Organisation (BRO), leh National Highways and Infrastructure Development Corporation Limited (NHIDCL) chuan he project hi an vil dawn a, Detailed Project Report (DPR) pawh pawm a ni hnai tawh.

CM chuan, "Covid-19 avanga harsatna tam tak karah Donyi Polo Airport chu ruahman aia kum thuma hmain sak zawh a ni," a ti. Airport sakna tur lumphum hi prime minister Narendra Modi-a'n kum 2019 khan a phum a ni.

Healthcare, education leh tourism-ah pawh hmasawnna nasa tak a thlen thu sawiin Khandu chuan, Digital India hmathlir tihhlawhtlinna turin state chhungah digital scheme hrang hrang hlawhtling taka kalpui a ni, a ti. "Tun hnaiah Minister of Information Technology chuan state chhung hmun hrang hrangah 4G tower 200 a hawng. Arunachal Pradesh-a medical college hmasa ber Tomo Riba Institute of Health and Medical Sciences (TRIHMS) hawn a ni bawk. State sorkar chuan Pasighat-ah leh Public-Private Partnership (PPP) hmangin Tawang-ah Sainik School din a ni bawk," tiin rural economy tih hmasawn nan sorkar chuan agriculture leh horticulture tan flagship programme, Atma Nirbhar Bagbani scheme leh Krishi Yojana-te a siam thu a sawi bawk.