Tripura Assembly rorel digital-in chhinchhiah tawh dawn

Tripura chuan tun thlaa budget session an neih tur aṭangin assembly inkhawma rorelte chu digital-in an chhinchhiah tawh dawn.

Digital India Mission hmalakna kalzelah, sorkar laipui chuan state leh UT tin rorelnaah lehkhapuan hman tihtlem a, digital-a kalpuina turin National e-Vidhan Application (NeVa) a siam a ni.

Tripura state hian February thlaa an inthlan avangin House-ah budget puitling a la pharh lo a, hei vang hian tun thlaah budget session hi a nei dawn a ni.

Assembly chief whip Kalyani Roy chuan, Assembly inkhawm digital-a chhinchhiah tur hi a tahtawla kalpui chhoh zel niin, digitalized vek tur chuan kum khat vel a ngai maithei tih a sawi. Assembly official-te chu House-a lehkha hmang loa rorelna kalpui a nih theihna turin training pek an nih thu sawiin Roy chuan, Chief Minister, Speaker, minister leh MLA-te chu training pek an la hmabak tih a sawi bawk.

Tun hnai khan state parliamentary affairs minister Ratan Lal Nath chuan Tripura Assembly hi tlawhin, digital platform hmanga session record kalpui tum dante chu a enpui a ni.