Congress-in Manipur chungchanga hma la chak loah sorkar laipui puh

Congress party chuan tualchhung buaina thlenna, Manipur-a nunphung pangngai a awm leh theihna tura hma la chak lohah sorkar laipui chu puhin, hma a lak vat loh chhan a zawt. RSS thiltum leh BJP sorkar chetdan tenawm tak avangin hmarchhak state-ah hian inhuatna a a thleng tih a sawi.

Congress general secretary Jairam Ramesh chuan, "Union Home Minister-in Manipur-a nunphung a pangngai leh nana hmalakna tur ṭha tak tak a sawi a; hengte hi engatinge a hma khan tih a nih loh? Eng vangin nge Modi sorkar hian Manipur state hi thla khat chuang harsatna a tawh tir? Manipur mipuite nunna ngaipawimawh loin an vote chiah a duh em ni? RSS thiltum leh BJP sorkar chetdan avangin northeast state hi ṭhendarhin a awm. Manipur-a thil thleng hian northeast state zawng zawng a nghawng a ni," a ti.

Ni thum chama Manipur tlawhtu, union home minister Amit Shah chuan buaina chhuak vanga nunna chante leh, in leh lo tihchhiat chhui chiang turin Judge retire tawh kaihhruai panel din a nih tur thu Ningani khan a sawi. Buaina chhuak kaihhnawiha case paruk chu special CBI team-in an chhui tur thu a sawi bawk. Sorkarin inkahhai a lo puan pui tawhte chuan an inremna siamte an bawhchhiat chuan na taka action lak a nih tur thute sawiin, ralthuam kawlte pawh police-te hnenah pelut vek turin a ngen.