SKM sorkar hnuah Sikkim sum leh pai dinhmunin hma a sawn : Sikkim CM

Sikkim chief minister PS Golay chuan Nilainia an sorkar kum li tlin lawmnaah, Sikkim Krantikari Morcha (SKM) sorkar hnuah state sum leh pai dinhmunin hma a sawn tih sawiin, chhiah lakkhawm pawh kum 2019 hnuah 57%-in a pung a ni, a ti.

Chief Minister chuan khua leh tuite tana phurrit siam loa chhiah tihpun dan ngaihtuah zel a ni a, hemi kawnga hmasawn theih dan tur pawh felfai leh langtlang taka kalpui a nih tur thu a sawi.

Sikkim khua leh tuite chu hmasawnna hna thawhpui tura sawmin Golay chuan, "Sikkim-in hmasawnna leh dinhmun ṭha a neih theih nan 'Team Sikkim' rilru pu chunga thawhho a ngai a ni," a ti.

Sikkim CM hi Delhi-a a zin vangin sorkar kum li tlin lawmna programme hi a champha aṭanga ni li hnuah an hmang chauh a ni. Delhi-a a cham chhung hian prime minister Narenda Modi nen inhmuin, tribal hnam Limbu leh Tamang-te tana assembly-a seat reserve pek theih dan tur leh, an state-a hnam 12-ten Scheduled Tribe (ST) status an ngiat chungchang te a sawipui.