Meghalaya : VPP President-in chaw ngheia nawrh titawp

Meghalaya sorkar-in sorkar hna lakna tura state chhunga hnam hrang hrang puala reservation a siam dana lungawi lo a, tiam chin awm loa chaw ngheia nuar Voice of the People Party (VPP) president Ardent Basaiawmoit chuan Ningani khan a nawrh a titawp. Darkar 221 chhung chaw a nghei hman.

Meghalaya sorkarin reservation policy ennawn tur expert panel din a remtih hnuah, VPP president hian a nawrh hi a titawp.

VPP hian reservation policy hi ennawn turin nasa taka Meghalaya sorkar an nawr hnuah, sorkar chuan thuchhuah siamin policy ennawn tur expert committee din a nih tur thu a puang a ni.

Basaiawmoit hian May 23 aṭang khan chaw ngheia nawrh hi ṭanin; June 1 chawhnu lam khan a titawp ta a ni. VPP president chuan mipuiin an thlawpnaah lawmthu a sawi a, hei hi a bul ṭanna chauh a ni tih sawiin, corruption pawh nasa takin a do dawn tih a sawi.