Assam sorkarin state chhunga biak-in awm zat chhiarpui nei

Assam sorkar chuan an state chhunga Kristian biak-in awm zat chhiarpui leh zirchianna a kalpui mek.

State home department chuan police station hrang hranga officer-in-charge te hnenah, an bial huamchhunga biakin awm zatte hrechiang turin a hriattir.

Hriattirna a pekah hian, police offier-te chu an huam chhung ṭheuha biak-in awm zat te, biak-in sak kum, biak-in hotute hming, address leh mobile number-te chu thehlut vek turin a ti a ni.

Senior police officer chuan hetiang survey hi police-te chuan a hma pawhin an lo neih tawh ṭhin thu leh, mosque awm zat pawh zirchian a nih thu a sawi. Survey neih hi khawtlang ṭhatna tura tih an nih thu sawiin, sorkar chuan tun kum zabi hma lama biak-in lo sak tawhte chu enkawl zui leh, an hmakhua a ngaihtuah vanga ti a nih thu a sawi.

Assam Darshan project hnuaiah state sorkar hian kum 2020, February 22 thleng khan sakhaw hmun pawimawh 910-te chu ṭanpuina sum a lo pe tawh a, heng zingah hian temple 458, sattras 186, namghars 123, mosque 47 leh biak-in 26-te an tel.

Kum 2019-20 khan Assam sorkar chuan Assam Darshan project hnuaiah sakhaw hmun pawimawhte ṭanpuina tur hian Rs vbc 91.50 a sem chhuak a, kum 2020-21 khan sakhaw biakna hmun 377 ṭanpuina turin Rs vbc 37.70 a lo semchhuak tawh bawk.

Hetih lai hian Assam-a Kristiante chuan biak-in chhiarpui neih hi duh loin, anmahni beihna tura ruahmanna a nih an ringhlel thung. United Christian Forum, Majuli president Padma Pegu chuan, "Sorkar aṭangin ṭanpuina kan beisei lo a, engkimah Pathianah kan innghat zawk a ni. Mahse sorkar chuan Kritian-te a rawn bitum a, an thiltih chhan hi anmahni ngeiin an hrechiang ber ang," a ti.

United Christian Forum of North East India (UCFNEO) pawhin survey neih tum chu an duh loh thu sawiin, khawtlang rilru a hruai diklo thei a ti. UCFNEI thupuangtu Allen Brooks chuan, "Nikum Krismas hma khan Assam police chuan hetiang thuchhuah hi an lo siam tawh a, chief minister chuan a inhnamhnawih loh thu a sawi. Mahse thla ruk pawh a ral hmaa circular tihchhuah a ni leh hi chief minister ngaihdan hriat kan duh a ni," tiin a sawi.