Hmarchhakah hri kai pun belh zel

Assam-ah Thawhlehni zan khan Covid-19 kai pathum hmuh belh leh niin, heng mite nen hian Assam-a hri kai hmuh zat hi mi 157 an tling tawh a ni. Hri kai hriat tharte hi Sarusajai Quarantine Centre-a awm lai an ni. Thawhlehni bikah khan Assam-ah hian hri kai hriat belh hi mi 42 an awm. 

Sarusajai Quarantine Centre-a awm, Covid-19 positive pathumte hi hri an kai tih hriat a nih hnuah centre aṭang hian an tlanchhuak a, mahse Nalbari leh Hojai police-ten umzuiin man leh nghal an ni tih health minister Himanta Biswa Sarma chuan a sawi. 

Tripura-ah pawh coronavirus kai pali hmuh belh an ni a, an pali hian Chennai aṭanga haw niin Thawhṭanni khan Tripura an thleng a ni. Heng mite nen hian Tripura-a Covid-19 kai hi mi 171 an awm tawh. 

Thawhṭanni khan Tripura mi, Chennai-a tangkhangte chu Shramik special train hmangin Agaratala thlenpui an ni. He rel-a chuang, mi 850-te sample chu lain test nghal vek an ni a, an zinga paliin hri hi an kai tih  hriat a ni a, hri kai enkawlna hmunah dah nghal an ni tih chief minister Biplab Kumar Deb chuan a sawi. 

Meghalaya-ah pawh Chennai aṭanga haw, Garo Hills-a mi chu Thawhlehni zan khan Covid-19 a kai tih hriat a ni bawk. Hri kai hmuh thar hi a taksaa natna langchhuak lo, asymptomatic a ni a, mahse state pawn lam aṭanga hawte test neihsak an nih hnuah hri hi a kai tih hriat a ni ta a ni. 

Meghalaya-ah hian Thawh-ṭanni khan Covid-19 kai enkawl lai awmchhun chu a dam avangin an state chu Covid-19 kai awm lohnaah a lo puang hman a, mahse a tukah hri kai hi hmuh chhuah thar leh a ni. 

Chief minister Conrad Sangma chuan an mi leh sa hmun danga tangkhangte chu an an haw khawm mek tih sawiin, state dang aṭanga hawte lo enfiahna tur screening point pawh siam belh a ni tih a sawi. 

Manipur-ah pawh nimin khan Covid-19 kai mi 11 hmuh chhuah belh an ni. 

Nimina hri kai hmuh belhte hi Chennai aṭanga haw vek an ni a, an zinga mi 10 hi Churachandpur khuaa mi an ni thung. 

Manipur-ah hian hri kai hmuh tawh hi mi 20 an tling ta a ni. State danga tangkhang hawte zingah Covid-19 kai hmuh chhuah belh zel an nih avangin, state sorkar chuan hri darh tur venna atana khuahkhirhna a siam pawh a tikhauh thar leh bawk. Damdawi dawr tih loh, dawr dangte chu zing dar 6 aṭanga tlai dar 2 thleng hawn phalsak an ni a, official pass nei lo motor pawh tlanchhuah khap a ni bawk.