Assam-ah Adivasi hel 39 an inpe

Assam-a Karbi Anglong district-ah kar liam ta Zirtawpni khan hel 39 chu sorkar kutah inpein, an ralthuam kawlte pawh security force-te hnenah an hlan.

Hel inpete hi Adivasi People's Liberation Army (APLA) memberte an ni a, 'Operation Smarpan' hnuaiah an ralthuamte nen sorkar kutah an inpe tih defence PRO Lt Col M Rawat chuan a sawi. Ralthuam an pek luhte hi AK series rifle pathum, pistol 19, rifles dang panga, grenade pahnih leh silai mu eng emaw zat a ni.

Lt Col Rawat chuan, boruak ṭha leh muanawm a awm theihna turin, security force-te chuan kawng dik lo zawh ṭhalaite chu kawng dik zawh a, nunphung pangngai zawk zawm turin an sawm reng a ni, a ti. Assam Rifles chuan tuna kawng dik zawh duha rawn inpete chu an thutlukna siamah a lawmpui hle tih sawiin, midangte pawh hlim leh thlamuang taka an awm theihna tura nunphung pangngai zawm turin a sawm zui bawk. APLA member zingah hian la in pe ve lo mi 40 vel an la awm.

Zirtawpnia inpete hi an pawl hotu, Sahil Munda-a'n a ho a ni. Lawmna hun buatsaihnaa thu a sawiah, Munda chuan an pawl chu kum 2019-a Adivasi National Liberation Army aṭanga chhuakte an ni tih sawiin, Assam chief minister Himanta Biswa Sarma kaihhruai sorkar hnuaiah Adivasi hnam harsatna hrang hrang chinfel sak an ni leh, hmasawnna nasa tak an hmuh avangin sorkar laka hel bansan a, nunphung pangngai zawm ve chu an tum ta niin a sawi.