Arunachal-a police station tinah CCTV dah turin hriattir

Gauhati High Court chuan Arunachal Pradesh sorkar hnenah state chhunga police station zawng zawngah CCTV dah vek turin a hriattir.

Kum 2018, February 19 khan pawngsualtua puh mi pahnihte chu mipui thinrim pungkhawmin, Arunachal Padesh-a Tezu Police Station aṭanga la chhuakin, an sawisa hlum a ni. Hemi chungchanga 'suo moto' PIL (Public Interest Litigation) thehluh a nih hnuah, court chuan police station-a CCTV dah vek tura thuthlukna hi a siam.

Court chuan he thil thleng hian state chhunga police station zawng zawngah CCTV changtlung tak dah vek a ṭulzia a tilang chiang hlea a ngaih thu a sawi. CCTV footage te hi Control Room in a vil ṭhin dawn a ni.

Additional Advocate General chu CCTV vuah tur thupek hi zawm vek a nih theih nana a ṭul anga hma la turin Court chuan a hriattir. Hei bakah hian, Assam Advocate General hnenah pawh Chief Justice Sandeep Mehta leh Justice Mitali Thakuria-te chuan Assam state chhunga police state-ahte CCTV hman a nih leh nih lohte finfiah turin a ti bawk.