KHNAM-in Meghalaya state-ah ILP hman duh

Meghalaya-a Khun Hynniewtrep National Awakening Movement (KHNAM) chuan Meghalaya state-a Inner Line Permit (ILP) hman a nih theihna tura hma la turin sorkar hnenah ziakin an thlen dawn tih an sawi.

KHNAM working president Thomas Passah chuan ILP chungchanga Assam Assembly-in resolution a lo siam tawh chu, sorkarin a bawhzui danah a lungawi thlak loh hle tih sawiin, resolution chu mipui bumna hmarua mai a ni, a ti.

Passad chuan sorkar chu resolution siam leh committee chauh duhtawk a, thutlukna siam tawhte bawhzui tum loah a puh. Kum 2018-a Khasi ṭawng Eighth Schedule-a dah tura resolution leh 2019-a ILP chungchang resolution an lo siam tawhte chu tun thlengin hma lakna engmah a awm loh thu Passad chuan a sawi a ni.

Meghalaya Residents’ Safety and Security Act (MRSSA) chu hnam dang, state chhunga lo lut tur vengtu atan a hman tlak loh tih sawiin, ILP hman hi a a ṭul tawh takzet tih a sawi bawk.

KHNAM hotu chuan ILP hman anih vang hian 'Tourism' in a tuar dawn lo tih sawiin, zin vei vakte chu dan loa lutah chhiar an ni dawn lo a, harsatna engmah an tawk dawn lo a ti a; ILP hian 'Tourism' a pui zawk dawn niin a sawi bawk.