Tribal rights group-in mega hydro project siam tum Hnar turin Arunachal Pradesh sorkar an ngen

New Delhi-based tribal rights group, Indigenous Rights Advocacy Centre (IRAC) chuan Ministry of Environment, Forest and Climate Change (MoEFCC) in Arunachal Pradesh-a 2,880 MW hydropower project siam a nih theihna tura ruahmanna a siam chu hnar turin state sorkar a ngen.

Kumin February thla khan sorkar laipui chuan National Hydro Power Corporation Limited-in Dibang luia Dibang Multipurpose Project a siamna tur chu a pawm a, project thawhna atan hian Rs vbc 1,600 ruahman a ni. Thawh zawh a nih hunah chuan India rama concrete gravity dam sang ber leh lian ber a ni dawn a, metre 288 zeta sang a ni ang.

IRAC chuan kar liam ta khan Arunachal Pradesh chief minister Pema Khandu leh chief secretary Dharmendra-te chu lehkha thawnin, he project hi Lower Dibang Valley district-a cheng, ram leilung fate tana a ṭha dawn lo tih an sawi. Hei vang hian project siam a nih theihna tura MoEFCC-a Forest Advisory Committee-in lui lama community reserve siam a rawtna chu hnar turin an ngen a ni.

Kum 2014 September thla khan committee chuan state sorkar hnenah hian Dibang leh Siang lui inkara ram zau tak chu national park-a puan a nih theihna atana hma la turin thurawn a lo pe tawh a ni. Mahse tualchhung miten national park atana puan tum huamchhunga an ramte pek an remtih lo a, hemi hnu hian Forest Advisory Committee hian kum 2022, October 17 khan national park tura tih chu tualchhung mite berawn a, Community Resrve or Conservation Reserve-a puang turin state sorkar hi a hrilh leh a ni. Mahse IRAC chuan hei hi duh loin, Committee rawtna siam lakah chuan fimkhur tur leh, hei hi an state leilung fate ram laksakna tura an thang kam a ni, an ti. Hei vang hian Committee rawtna siam hi hnar turin state sorkar chu an ngen.