Manipur-in August 15 thleng lockdown pawtsei Ni khata hri kai hmuh tam ber ni a thleng leh

Manipur cabinet meeting, Ningania neih chuan an state chhunga hri lengin ziaawm lam a la pan loh avangin state puma complete lockdown puan chu August 15 thleng atana pawhsei a rel. 

State chhunga hri kai hmuh chhuah belh zingah pawn lama zin chhuahna nei lo an pun zel avangin, sorkar chuan hri leng darh zel tur venna atan inkharkhipna kalpui mek chu pawhsei a rel ta a ni.

Inkharkhipna kalpui a nih chhung hian essential service erawh ngaihhnathiam a ni dawn a, nitin khawsakna atana mamawh zawrhna dawrte chu Pathianni ni tih loh, ni dangah chuan zing dar 8 aṭanga chhun dar 12 thleng hawn phalsak an ni ang. 

Ningani khan Manipur-ah hian hri kai hmuh chhuah tam ber ni a thleng leh a, hri kai hmuh thar mi 124 an awm. An zingah 21 chu state pawn aṭanga haw niin,Central Armed Police Force (CAPF) mi pakua an tel. Tualchhung mi hri kai hmuh thar mi 94 te chu hmun danga zin chhuahna nei lo an ni tih additional health director Dr K Sasheekumar Mangang chuan an sawi. 

Hri kai hmuh chhuah tawh hi mi 3,217 an tawm awh a, an zinga 536 chu central security force mi leh sa an ni. Mi 1,905 enkawl dam an ni tawh a, hri la kai mek zingah civil mi 851 leh armed force mi 453 an awm.